គណៈកម្មាធិការអចិន្រ្តៃយ៍រដ្ឋសភាយល់ព្រមលើសំណើ សុំជ្រើសតាំងសមាជិកក្រុម ប្រឹក្សាធម្មនុញ្ញ១រូប

គណៈកម្មាធិការអចិន្រ្តៃយ៍រដ្ឋសភា បានយល់ព្រមលើសំណើសុំជ្រើសតាំងសមាជិកក្រុមប្រឹក្សាធម្មនុញ្ញ១រូប សម្រាប់ជំនួសឯកឧត្តម អ៊ឹម សួស្តី សមាជិកក្រុមប្រឹក្សាធម្មនុញ្ញដែលត្រូវបញ្ចប់អាណត្តិ។

អង្គប្រជុំគណៈកម្មាធិការអចិន្រ្តៃយ៍រដ្ឋសភាដឹកនាំដោយសម្តេចអគ្គមហាពញាចក្រី ហេង សំរិន ប្រធានរដ្ឋសភា នៅព្រឹកថ្ងៃទី៣ ខែមីនានេះ បានសម្រេចប្រគល់ភារកិច្ចឱ្យអគ្គលេខាធិការដ្ឋានរដ្ឋសភា ធ្វើសេចក្តីជូនដំណឹងផ្សព្វ ផ្សាយជ្រើសរើសបេក្ខជន ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ។ ជាមួយគ្នានេះ ក៏បានទទួលយកសំណើរបស់រាជរដ្ឋាភិបាលនូវសេចក្តីព្រាង ច្បាប់ស្តីពីការការពាររុក្ខជាតិ និងភូតគាមអនាម័យ ដើម្បីគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធាន ទឹក នៃរដ្ឋសភា ពិនិត្យសិក្សា និងធ្វើរបាយការណ៍ជូនគណៈ កម្មាធិការអចិន្រ្តៃយ៍រដ្ឋសភាវិញ មុនឈានដល់ការអនុម័តក្នុងរដ្ឋសភាពេញអង្គ៕